18th March, 2022 : 

Pu Robert Romawia, Minister, ICT Department chuan vawiin 18th March, 2022 (Fri)-ah PMJVK scheme hnuaiah Govt. Zawlnuam College-a din tur IT Skill Development and Training Centre lungphum a phum. 

He Centre hi he College-a zirlaite bakah Zawlnuam leh a chhehvel thalaiten computer course chi hrang hrang an zirna tura ruahman a ni a. A infrastructure tulte hi Rs 99 Lakh senga siam tur a ni a, a sum 50% hi Mizoram sorkar kutah a lo thleng tawh a ni. 

Pu Robert Romawia Royte chuan Zawlnuam College chu nuam ti taka a lo thawh ve thinna a nih thu sawiin, a Minister nih hlim kum 2019 kumtira Zawlnuam Tourist Lodge leh Zawlnuam College Hall thar a hawn kha Minister anga a thil hawn hmasakna a nih thu a sawi a. Kum 3 chhunga a vawi 2 na atan Govt.Zawlnuam College-ah bawk IT Centre lungphum a phum leh thei chu lawmawm a ti a. 

He College lo puitlin theih na tura theihtawp chhuahtu, boral tawhte leh la dam mekte pawh a tharin zahna chibai a buk a. Tunlaiah IT thiamna a pawimawh a, NIELIT hotute nen lo rel tawh angin he Centre ruhrel peih veleh zirtirna kalpui zui a nih tur thu a sawi. 

He College Principal lo ni tawh thin Pu Robert Romawia Royte chuan Govt Zawlnuam College ten a phu loh Chawimawina Citation an hlan chu lawmawm a tih thu a sawi bawk.

IT Centre Lungphum Function hi Govt Zawlnuam College Principal Prof Harendra Sinha-in a kaihruai a, Pu Vanlalringa, Sr Informatics Officer-in Technical Report pein VCP Pu CT Sanga'n lawmthu a sawi a ni.

Pu TC Pachhunga, Ex MLA & Vice Chairman, ICT, Tourism leh  SYA Development Board leh official pawimawh dangten Sports Minister hi an tawiawm a ni.

---------------------------------------------------------------------------------------------------------------