Ni 8.4.2021 (Ningani) khan Information & Communication Technology (ICT) Department Minister Pu Robert Romawia Royte chuan Mizoram-in IT zirna lama hma a sawn theih nan School thlan chhuah 71 hnenah Computer set a sem. 

Computer sem chhuah Programme hi Aizawl Vanapa Hall-ah hman a niin Khuallian Pu Robert Romawia Royte, ICT Minister chuan zirna inah hian Computer hi a pawimawhin, a tel lo chuan kan awm thei lo takzet tawh a ni a ti a. Covid-19 vanga hmasawnna hna hrang hrang duh anga thawh theih a ni lo chunga hetiang zat computer sem chhuah theih a ni chu thil lawmawm tak a niin heng Computer leina atan hian Mizoram State sorkar sum pakhat mah hman a ni lo va, Computer pawh branded a nih mai bakah a chak that chungchang-ah pawh chak tha tawk tak leh quality sang tak a ni a, zirnaah heng computer hian danglamna (change) a thlen ngei ngei ka beisei takzet a ni a ti. 

Minister chuan heng computer te hi tam tak chu thingtlang kil khawr tak tak a thleng ngei ang a, khawtlang pawhin School enkawltu te ruahmanna hnuaiah tangkai taka an hman theih chuan a lawmawm hle ang a ti. Computer dawng tu School hrang hrangten Computer an hman tangkai chhunzawm dan chu ICT Deptt. chuan vil zui satliah mai lovin an hman tangkai dan a the leh dawn a, a hmang tangkai zual te thlang chhuakin lawmman a siamsak leh dawn a ni a ti. 

ICT Deptt. chungchang sawi chhunzawmin Pu Robert Romawia Royte chuan ICT Deptt. chu Deptt. la naupang leh lian lo tak ni mahse he Deptt. tel lo chuan Mizoram sorkara Deptt. thenkhatte hi chu ni khat chauh pawh kan kal hlei thei lo a ni a ti a. Department Budget ruahman tlem hle mahse pawn lam atanga sum tam zawk hailuh zel a ni a ti a. Tun atanga hun rei lo teah Smart Classroom programme pawh kalpui leh tum a ni a ti.

ICT Department chuan School tinte an mahni hmun theuhah dah sakin Installation zawng zawng pawh a tihsak leh vek dawn a, tuna heng Computer dawngtu School te hian tuna School Session tan chhoh mek rual hian an hmang tangkai nghal thei tura beisei a ni.

Computer sem chhuahte hi Ministry of DONER, North Eastern Council (NEC) Shillong hnuaia Project “IT Education Programme for 150 Schools in Mizoram” atanga pek chhuah a ni a. He Project Implementing Agency hi Information & Communication Technology (ICT) Department hnuaia Mizoram State e-Governance Society (MSeGS) niin, a Project Cost hi Rs. 600 lakh a ni. Mizoram chhunga School hrang hrang 150 hnenah Computer hi pek tura ruahman a ni a, Nikum March thla khan School thlan chhuah thenkhat te pek tawh an ni a, vawiin hian la pek loh School 71-te hnenah pek a ni leh ta a ni. 

He project hnuaiah School pakhata Computer Set 7 pek te hi CPU Brand-ACER, Processor Core - i5, 9th Generation, RAM 4-GB, Hard Disk 1-TB, CD Drive, Keyboard, Mouse, Monitor 18.5 inches niin MS Office leh Antivirus a tel bawk a, hei bakah hian Multi function Printer (Print, Scan & Copier) leh UPS 4 (pali) a keng tel a ni. 

Computer semna programme-ah hian Pu Lalramsanga Sailo IRS, Spl. Secretary ICT Deptt. in kal khawmte lawmna thu sawiin, Pu Vanlalringa Sr. Informatic Officer in Technical Report a pe a, Computer dawngtu School aiawhin Pu Hmingchungnunga, MISSTA President chuan lawmthu a sawi a, Dr. Lalthlamuana, Chief Informatic Officer-in lawmthu sawiin hun a khar a ni.